السبت، سبتمبر 30، 2006

Ramadan TV - تلفزيون رمضان

شاهدت من يومين - عن طريق المصادفة - برنامج آلو المذاع على القناة الأولى الساعة 1.30ص
كان سؤال البرنامج الاول - و الذي أغلقت التليفزيون بعده - عن جملة مأثورة شهيرة لممثل معروف
جملة نستعملها في حياتنا اليومية
كان المشهد من فيلم العار - بطولة نور الشريف، حسين فهمي و محمود عبد العزيز
المشهد كان لنور الشريف و هو يسأل تاجر المخدرات عن سبب قلقه
"مال لونك غامق ليه يا...النهاردة؟"
و مطلوب معرفة الكلمة الناقصة، و المتسابقة التي اتصلت أمامها 60 ثانية فقط
المتسابقة حاولت تذكر أو تخمين الإسم، و المذيعة تساعدها. الإسم أوله ف و المتسابقة تردد
"فواني..فننس..فنواتي..فنواني..الخ"
و المذيعة تساعدها
"لو استبدلنا حرف النون بحرف الثاء" الغريب أنها أصرت على ث و ليس س
المهم المتسابقة خمنت أن الاسم (فثواني)..فثواني..يا ما شاء الله
تخيلوا مستوى الإعلام و المتفرجين وصل لحد فين؟
حاجة حلوة خالص
.كنا مرة قاعدين في الشركة بعد الشغل بنتناقش في موضوع
لما الواحد يكلم ناس أقل منه فكريًا او ثقافيًا يكلمهم ازاي؟
أنا كنت - في الأول - شايف أنه ينزل لمستواهم عشان ميبقاش متكبر أو مغرور
لكن شعبان - زميلنا من قسم الترجمة - شايف إن ديه أنانية. و أن المفروض يطلع بيهم لمستواه عشان يبقى أفادهم و لم يبخل عليهم بفكره أو ثقافته، و أن ده دور المثقفين أصلا و هو النهوض بالمستوى الفكري للمجتمع مستغلين كل ما تعلموه من مهارات و أفكار
يعمي الواحد يرتقي بمستواهم الفكري حتى لو من الصفر ، مش بس يكتفو بأنهم يزودو من قائمة الكتب اللي قروها كل يوم، و يبقى فيه تفاعل حقيقي مع كل قضايا المجتمع سياسية أو دينية أو غيرها
و بصراحة أنا اقتنعت لأن كلامه كان مقنع جدا
ييجي شعبان يشوف المستوى اللي إعلامنا بيحاول يوصل الناس ليه
و ربنا يخلي لنا فثواني

0 تعليقات:

إرسال تعليق

فضلا اترك تعليقك أو أكتب طلبك هنا، مع الحفاظ على أدب الحوار، واكتب اسمك من فضلك....