مذكرات - سواق الميني باص

كما لا يعلم الكثير منكم - أو تقريباً محدش أصلاً - أنني أعمل في شركة في مدينة نصر - الحي السابع
و أنا مروح من الشركة الخميس اللي فات، و زي ما اتعودت طلعت ركبت جمب سواق الميني باص 46

مش عارف ايه اللي بيخليني أختار الكرسي اللي جمب السواق، بس هو بمكن مريح شوية

المهم كالعادة الطريق منيل و الاشارة قفلت علينا مرتين، و كل مرة الناس تقول أكيد في حد مهم معدّي - و بصراحة عندهم حق - الاتجاه المقاطع لينا كان ماشي قشطة أوي.....طبعا الناس عندنا في مصر، أغلبهم اشترى عربيات عشان يزمر بيها - آه والله

!و كله اشتغل كلاكسات ما عدا السواق اللي جمبي

غريبة مش كده، بس هو الراجل كان قرفان من المرور شوية - وده حقه

المهم عدينا من الاشارة على خير هي و كل ما بعدها - و زي كل يوم كانت اشارات زفت

لحد ما وصلنا شارع (أحمد عصمت) و هو ه شارع رئيسي في عين شمس الشرقية و كل الناس - تقريبًا - بتروح منه

أظن خمنتو شكل الشارع ايه؟

الشارع للأسف ضيق و المصيبة أن العربيات فيه بتركن صفين على كل جنب، و يتبقى مكان لعربيتين بس مزنوقين او ميني باص محندق (صغير يعني)، و بصراحة الناس مبتبطلش كلاكسات في الشارع ده. بداعي و بدون داعي حتى لو الطريق فضي شوية

السواق طبع وقف فيه خمسين مرة عشرين بسبب المرور و تلاتين بسبب الركاب

جه الطريق وقف خالص و واحد ورانا مبطلش كلاكسات

فالسواق بصلي و قاللي

"الراجل اللي ورا مش فاهم بيزمر عشان أعمله ايه؟"

قلتله

"ما هم كلهم بيزمروا لبعض أصلا"

رد على

"ما هو أنا لو زمرت أبقى حماار، لا اللي قدامي هو اللي قفل الاشارة ولا هو اللي موقف الطريق"

و سكت شوية و كمل

"و حتي لو هو، المفروض بدل ما أزمره أساعده في حل المشكلة"

ياااااااااااااااااااااااااااه...........يا سلام لو كل السواقين عندنا كده

ساقية الصاوي اللي كنت كلمتكم عنها قبل كده، حطت اعلانات في الزمالك جمب مقرها عنوانها

(جرب القيادة بدون زمارة)

والله يا ريت، جرب يوم واحد متحطش ايدك ع الكلاكس ... امسك نفسك. الشيطان هيوزك و يقولك "يا واد ما كله بيزمر"، استحمل حبة و شوف في آخر اليوم هيبقى شكلك عامل ايه

جرب و مش هتخسر والله

سلام